Bizkaiko Elikagai Bankuaren Gabonetako kanpainan laguntzen

Txurdinagabarri Egoitzako eta Eguneko Zentroko lagun talde batek Bizkaiko Elikagai Bankuaren Gabonetako kanpainan parte hartu berri dugu, langile boluntario moduan.

Iaz geratu zen bezala, gure postua Txurdinaga auzoko supermerkatu batean zegoen, Egoitzatik hurbil. Bertaraino joan ginen bi taldetan, bat 9:15etik 11:30era arteko txanda egitera, eta bestea aurrekoari lekukoa hartu eta 13:15era arte laguntzera.

Gure zereginak ziren erosketak egitera sartzen ziren pertsonei kanpainan parte hartzeko aukera zutela jakinaraztea, produktuak zuzenean erosiz edo, kutxan ordaintzean, Elikagai Bankuaren kontuan ekarpen ekonomiko bat eginez. Produktuak erostearen alde egiten zutenei poltsa bat ematen genien, eta produkturik egokienak zein ziren jakinarazten genien.

Bezeroak poltsekin irteten zirenean, Bankurako zirenak jaso eta edukia sailkatzen genuen, elikagai motaren arabera pilatuta.