Penaz eta bideodeien bidez despeditu dugu belaunaldien arteko programa
Aurten, Covid-19aren epidemiak galarazi egin digu Berriotxoa eta Begoñazpi ikastetxeekin dugun belaunaldien arteko truke programa nahi genuen bezala amaitzea.
Aurreko edizioetan, jai bat ospatu izan dugu neska-mutilei ekintzetan parte hartu izana eskertzeko eta alaitasunez despeditzeko. Oraingoan, koronabirusak bertan behera utzarazi dizkigu bisitak eta elkarrekin egiten genituen ekintzak, eta, martxoaz geroztik, ezin izan ditugu gure lagunak Egoitzan hartu.
Pena handia eman digu, eta arratsaldeetan asko bota izan ditugu faltan, konpainia egiten zigutelako, entzuten gintuztelako eta tarte on bat igarotzen genuelako barre eginez eta kontu kontari. Jarduera asko egin ditugu elkarrekin: josten erakutsi diegu, partidak jokatu ditugu XBoxen, sukaldean aritu gara, Trivialen jokatu dugu, makillatu eta orraztu egin gara estetika tailerrean, elkarrekin irakurri dugu…
Horregatik, azken bi hilabeteetan etortzerik izan ez duten arren, harremana mantentzen jarraitu dugu bideodeien bitartez, eta horrek gogorarazi digu adiskidetasuna birusa baino indartsuagoa dela.
