Reusera bidaiatu dugu Bellissens Zentroaren lana ezagutzeko
Aita Menni Ahizpa Ospitalarioen Jokabide Nahasmenduak dituen Desgaitasun Intelektualaren eta Autismoaren Espektroko Unitateko arreta zuzeneko taldeak, Macarena Aspiunza psikologo klinikoak koordinatuta, bisita egin zuen Pere Mata Fundazioaren Villablancako Bellissens Zentrora, joan den irailaren 28an. Desgaitasuna eta osasun mentaleko arazoak dituzten pertsonentzako baliabide hori Katalunian abian jarri zen lehena izan zen, duela 50 urte baino gehiago, eta arlo horretako erreferenteetako bat izaten jarraitzen du.
Reusen (Tarragona) dagoen zentro horretako terapeutekin egindako topaketa aberasgarrian, gainera, Leire Zamora eta Cristina Iriarte psikologoek, Minerva de Cos gizarte langileak, Ruth Diaz Crespo eta Naroa Odriozola begiraleek eta Oihane Garcia erizainak parte hartu zuten.
Egoitza zerbitzua osasun mentalera, gizarte zerbitzuetara eta jokabidearen nahasmenduak dituen desgaitasun intelektualaren arretara bideratuta dago, eta helburua da autismoaren espektroko nahasmendua (AEN) eta desgaitasun intelektuala (DI) duten pertsonei errehabilitazioa eskaintzea, ahalik eta integrazio komunitariorik handiena lortzea eta pertsona horien eta familien bizi kalitaterik onena lortzea.
Gure taldeko terapeutentzat, bisita «express» hori oso interesgarria izan zen Bereziki eskerrak eman dizkiote Bellissenseko asistentzia talde osoari jasotako tratuagatik, baita taldeko gainerako kideei ere, instalazioak erakusteagatik eta beren lan modua eta zenbait estrategia terapeutiko partekatu nahi izan zituelako.
Indarrak batu
Bellissens Zentroak gizarte baliabideen sare trinko bat du, hain profil konplexua duten pertsonen lanketa integrala ahalbidetzen duena. Europako ikerketa proiektuak ere sustatzen eta laguntzen ditu, ebidentzia zientifikoan oinarrituta, AENa duten pertsonentzat onuragarriagoak izan daitezkeen terapiak eta tratamenduak ikertzeko, bai esparru sanitarioan, bai etxearen eta hezkuntzaren esparruetan. Halaber, profesionalen prestakuntza espezializatua sustatzen du osasun mentalaren eta desgaitasunaren arloan.
Aita Menni Ospitaleak bezala, Bellissensek arreta gune indibidualizatuak ditu, eta jarduerak egiteko beste batzuk, jantokiak, egongela, ikus-entzunezko eta jolasetarako gelak, baita helburu terapeutikoak dituzten ikasgelak ere, baliabide normalizatuen erabilera errazteko eta autonomia pertsonala eta eguneroko jardueretan parte hartzea sustatzeko. Zentroak, gainera, robotikako tresnak, 360º-ko errealitate birtualeko instalazioak eta murgilketarako beste teknologia batzuk ditu, pazienteekin eta erabiltzaileekin ingurune erreal desberdinetan lan egiteko.
Bellissens Kataluniako Generalitateko Lan, Gizarte Gai eta Familia Sailarekin itundutako zerbitzu bat da. Nahasmendu mental larria edo desgaitasun intelektuala edo autismoa duten pertsonen gizarteratzea eta laneratzea bultzatzea da Mestral eta Garbi egoitza horien beste helburuetako bat; bakoitzak 50 plaza ditu, portaeraren nahasmenduak dituen desgaitasun intelektuala eta laguntza premia handiak dituzten pertsonentzat. Bi egoitzak ezagutu genituen, baita Atria egoitza ere, DI, AEN eta portaeraren eta garapenaren nahasmendu larriak dituzten haur eta gazteentzako 12 plaza dituena.
