Bilbon ez dugu etsitzen Aste Nagusirik gabe geratzera

Joan den abuztuan Bilbon Aste Nagusia ofizialki ospatu ez bazen ere, Txurdinagabarri Egoitzan ez genuen etsi eta geure jai partikularra antolatu genuen.

Astelehenean, abuztuak 24, gure Marijaiak Egoitzako bost solairuak igaro zituen Kepa Junkeraren jai ereserki ezagunaren doinuekin, gure kantu eta dantzen artean.

Egoiliarrek eta langileek eskulan tailerretan prestatu genituen zapi urdinak jantzi genituen, eta arretaz entzun genuen jaietako pregoia, alaitasunez eta umore onez disfrutatzera eta gure bilbozaletasuna erakustera animatzen gaituena.

Eta, hortik aurrera, kantuak bata bestearen atzetik –ez ziren “bilbainada” tradizionalak falta izan–, dantza eta alaitasuna, izan ere, beste urte batez, eta ororen gainetik, gure hiriko jaia ospatu genuen.