Etxeko gurinezko galletak sukaldaritzako tailerrean

Asteazkenero, 10:30ak inguruan, Ezintasun Intelektualeko, Buru-nahasmenduko eta Jokabidearen Nahasmenduko Unitateko (UDITRAC) sukaldaritza-taldeko kideak sutondoaren inguruan biltzen dira. Zazpi pertsona inguru dira eta errutina bati jarraitu ohi diote. Lehendabizi, guztion artean errezeta irakurtzen dute; gero, zer prestatuko duten, lana antolatzen dute.

Kasu honetan etxeko galleta gozoak egin dituzte. Taldeko hiru kide irina, azukrea eta legamia nahasteaz arduratu dira. Gero, gurina mikrouhin labean sartu dute, biguntzeko eta gero, bol batean dena nahasteko.

Osagai guztiak izanda eta ore homogeneoa lortuta, gaineko sukaldea irineztatu zuten, orea ogia izango balitz bezala oratzeko. Ore hori ordubetez pausatzen utzi behar zuten hozkailuan, beraz, bitartean kafea hartu zuten. Beti dira pazienteak prestatzen eta zerbitzatzen dutenak.

Gozogintzako benetako profesional batzuk gisa, moldeekin formak atera aurretik, orea arrabolarekin lautu zuten. Galletak erretiluan jarri ondoren zenbait elementurekin apaindu eta beste 15 minutuz labekatu zituzten.

Baina ez dituzte gozokiak bakarrik egiten. Aurreko astean porruez egindako pastel aparta egin zuten, esnegainaz, hostorez, porruz, gaztaz, urdaiazpikoz eta arrautzez. Gainera, esnea eta beste gauza asko batzuk jaten ez dituen paziente batentzako platerak prestatzeko gai dira. Gutxienez hilean behin berak jan dezakeen errezeta bat egiten dute. Horrela, gastronomiari buruz ikasteaz gain, aniztasun dietetikoaz eta janari-alergiak izaten dituzten pertsonek aurre egin behar dieten arazoez jabetzen dira.